Cynnydd mewn boddi damweiniol yn arwain at alwadau i Barchu’r Dŵr

Mae Diogelwch Dŵr Cymru yn annog pobl ledled y wlad i Barchu’r Dŵr a lleihau boddi yn ystod yr haf eleni ar ôl cynnydd pryderus mewn marwolaethau’n gysylltiedig â dŵr.

Daw’r alwad wrth i’r ffigurau diweddaraf o’r Gronfa Ddata Digwyddiad Dŵr (WAID) ddatgelu bod 25 o farwolaethau yn nyfroedd Cymru o ganlyniad i foddi damweiniol yn 2020, wedi cynyddu i 25 o’u cymharu â 20 yn y flwyddyn flaenorol. (1)

Dyma’r tro cyntaf mewn pum mlynedd i nifer yr achosion o foddi damweiniol yng Nghymru gynyddu. Mae’r boddi damweiniol hyn yn rhan o gyfanswm y marwolaethau sy’n gysylltiedig â dŵr yng Nghymru sef 50 ar gyfer 2020, un yn llai na’r cyfanswm o 51 ar gyfer 2019 (2).

Cododd nifer yr achosion o foddi damweiniol ledled y DU hefyd yn 2020 i 254, sef cynnydd o 34 o’u cymharu â’r flwyddyn flaenorol.

Mewn galwad i weithredu, mae aelodau o’r grŵp atal boddi Diogelwch Dŵr Cymru wedi dod ynghyd i ofyn i bawb #Parchu’rDwr a chefnogi’r ymgyrch genedlaethol i leihau boddi a gynhelir yn ystod yr haf eleni.

Nod yr ymgyrch hon ar y cyd yw lleihau nifer y marwolaethau sy’n gysylltiedig â dŵr a niwed cysylltiedig. Cefnogir yr ymgyrch gan sefydliadau o ystod eang o sectorau gan gynnwys cyrff llywodraethu chwaraeon, gwasanaethau achub, rheoleiddwyr, awdurdodau llywio a harbwr, llywodraeth leol, cyfleustodau a’r rhai sy’n cynrychioli. gweithredwyr chwareli – pawb sy’n rhan o Ddiogelwch Dŵr Cymru.

Mae’r ymgyrch genedlaethol yn ceisio darparu cyngor syml ar gyfer achub bywyd a all helpu aelodau’r cyhoedd i gymryd cyfrifoldeb am eu diogelwch eu hunain a’u teulu trwy ddilyn y canllawiau hyn:

• Os cewch eich hun yn annisgwyl yn y dŵr, Arnofiwch i fyw
• Os ydych chi’n gweld rhywun arall mewn trafferth yn y dŵr, ffoniwch 999 neu 112

Sylwadau eraill i farwolaethau o ganlyniad i foddi damweiniol yng Nghymru:

• Mae 80% o’r holl farwolaethau boddi damweiniol yn gysylltiedig â gwrywod.
• Roedd bron i hanner (44%) o’r achosion o foddi damweiniol yn cynnwys pobl heb unrhyw fwriad i fynd i mewn i’r dŵr, gan gynnwys pobl yn cerdded neu’n rhedeg yn ymyl dŵr
• Dyfroedd agored mewndirol megis afonydd a llynnoedd oedd y prif leoliadau gyda 56% o’r marwolaethau damweiniol yno
• Digwyddodd bron i draean (32%) o’r achosion o foddi damweiniol ym mis Awst a digwyddodd  dros hanner ohonynt (52%) ar benwythnosau

Dywedodd Chris Cousens, Cadeirydd Diogelwch Dŵr Cymru:

“Yn ystod yr haf diwethaf cafwyd heriau sylweddol yn ein dyfrffyrdd arfordirol a mewndirol. O ganlyniad i hyn mae aelodau Diogelwch Dŵr Cymru wedi penderfynu dod at ei gilydd yn ymgyrch #Parchu’rDwr i helpu i atal marwolaethau pellach. Rydym yn annog y cyhoedd i ddeall y peryglon, i ddysgu pwysigrwydd gwybod sut i arnofio i fyw, a ffonio 999 os bydd pobl eraill mewn trafferth ac os oes argyfwng cysylltiedig â dŵr. ”

Ym mis Rhagfyr, lansiodd Diogelwch Dŵr Cymru’r strategaeth atal boddi gyntaf yng Nghymru, gyda’r nod o weld dim marwolaethau yn gysylltiedig â dŵr yng Nghymru erbyn 2026.

Dywedodd Chris Cousens: “Mae Diogelwch Dŵr Cymru yn credu bod hyd yn oed un farwolaeth yn ormod ac ni ellir pwysleisio gormod effaith colli rhywun o ganlyniad i farwolaeth yn y dŵr. Byddwn yn lleihau boddi os bydd pawb yn chwarae eu rhan, a nod Strategaeth Atal Boddi Cymru 2020-2026 yw galluogi pobl sy’n byw yng Nghymru yn ogystal ag ymwelwyr i fod yn fwy diogel mewn, ar ac o gwmpas dŵr trwy leihau marwolaethau a digwyddiadau’n gysylltiedig â dŵr. ”

I weld a lawrlwytho adroddiad WAID 2020, a gynhelir gan y Fforwm Diogelwch Dŵr Cenedlaethol, ewch i: https://nationalwatersafety.org.uk/waid/annual-reports-and-data/